طريقه الكبده الاسكندراني
طريقه مجربه ولذيذه لعمل كبده اسكندراني وهتدعيلي الوصفه دي بجد اسهل واجمل واسرع من الطرق التقليديه لعمل
الكبده.
المكونات
نص كيلو كبده بقري مقطعة شرائح صغيرة جدا (تقطيع شاورما)
ملح -- فلفل اسود
2 قرن فلفل اخضر حراق مقطع حلقات رفيعة (يمكن استبداله بفلفل رومي للي مش بيحبوا الاكل الحراق)
2 معلقة كبيرة ثوم مفروم
نص معلقة صغيرة كمون
معلقة كبيرة خل
ليمونة كبيرة
ربع كوب زيت ذرة زيت
الطريقة :
ضعي زيت الذرة في طاسه عميقة او حله وسخنيه وبعدين حطي الكبده كلها مع حبة فلفل اخضر وحبه ملح وفلفل اسود ومعلقة ثوم كبيرة وغطي عليها سيبها ربع ساعة تنزل مايتها وتشربها وبعدين تكوني جهزتي فسلطانية او طبق صغير الخلطة دي : الكمون والثوم والخل وعصير ليمونة كبيرة وباقي الفلفل الاخضر وقلبيهم جيدا واول ما تحسي ان الكبده قربت تستوي تضيفي الخلطة دي كلها وتخفضي النار شوية وتغطيها وتسيبيها تشرب بقا الخلطة دي تماما بس ماتنشفش يعني سيبي فيها حبة مايه صغيرين .
وحضري عيش فينو او اي عيش انتي بتفضليه واعملى سندوتشات والماية اللى فاضله فى الحلة او الطاسة وزعيها جوا السندوتشات فالاخر وقدمي معاها ليمونة وبطاطس محمرة ومخلل
وبالهنا والشفا وماتنسيش الدعاء بقا
يسعدنا تفاعلكم بالتعليق، لكن يرجى مراعاة الشروط التالية لضمان نشر التعليق
1أن يكون التعليق خاص بمحتوى التدوينة
2أن لا تضع أي روابط خارجية